2Cor 1 | WSK | STEP | Ani Paul, Kaem kota aga balam se ani Jesus Kristus ko apostle bagasam, ale nanga bo Timothy ilak tam gawa imi bataguru nina Kris alo Corinth bagasan, se Kris suen la Achaia sor te, mu ningarsan.

2 Corinthians 1

Den gira

1 Ani Paul, Kaem kota aga balam se ani Jesus Kristus ko apostle bagasam, ale nanga bo Timothy ilak tam gawa imi bataguru nina Kris alo Corinth bagasan, se Kris suen la Achaia sor te, mu ningarsan.

2 Anananga Nainet Kaem, nanga Biya Jesus Kristus ilak, nunga nongomang yawara, se nunga lila ningarmon se te bagaralko.

Kaem mu nangamang motam sokel tua ko duap

3 Ana nanga Biya Jesus Kristus ko Kaem se ko Nuet mu nup patowanakko. Nu anananga Nainet yawara, gomang nangarso ale pempem nangamang motam sokel tuso. 4 Nu anananga ikup suen la te nanga sangarso. Umutang te ana betela awiriya ikup nongote ago, mu sokel ana Kaem kote taman mu te nunga sangornak, ale nongomang motam ira murunak, ale sokel tunakko. 5 Kristus ikup yaman ninguru gikaso iwitata, ana ikup yaman ninguru gisan. Bare Kristus nangamang ninguru tala sokel tuso. 6 Se ana ikup gisan imi mu ninga sanguk se nina te yawarakala bagaralko. Mu awuk, ana ikup gisan bare Kaem nanga sangarso se te sokel ago sanamasan. Se nina mu ko ikial ale te nengemang motam sokel tauk, se ikup giwasan mu te sail agotala sanamaralko. 7 Mu nina ana ikup giwasan iwitatala ikup gisan. Bare ana ninguru ikisan, nina te sail ago sanamaralko. Mu awuk, ana ikisan Kaem nanga sangarso iwitatala, ninga sanguk ale nengemang sokel tuokko.

8 Aga singsang, ana nina ikialko ninga manorsan, ana Asia sor te bagakasan mu nuna ninguru nanga bita maguwukasan, se ana ikup memek ninguru gikasan. ^{▼▼2 Cor 1:8 Nuna ikup ninguru gikasan: Acts 19:23.} Ikup yaman mu ikup biya nunguningkiri, ana ginakko koma mena, se ana ikikasan ana kuenakko iwita ikikasan. 9 Ana nainimi ko ikikasan mu ana kuenakko lage te maingkala aragaman. Bare ikup mu aratukaso mu ana te ikinakko, ana nangata nanga nasokel te ikup ginakko me terong ma balnak, ale Kaem kariimet kuera nunga maraguwuso mu nanga sangukko nangamang ningi nunguning arukko. 10 Ana ikup memek mu te kuenakko iwita, bare te nu nanga sangaru tam. Se tom udagi te betelatala, nu nanga sanguk mu ko ana nangamang ningi nunguning aram. 11 Bare nina ninga ngatangara te ana am ago nanga saongalko. Se Kaem nenenga ngatang, se kariimet saki nunga ngatang ikiok mu, nigiring iluwok ale nanga sangukko, umutang te kariimet suen biya amilmil biyala nu tumonko.

Paul ko ikia aguwaya se Corinth me namaram wore ko duap nunga maonam

12 Ana mel ikisan nunguningta se ko amilmilasan mu iwita: anananga bagara aolak ali imi te, mu ali imi ko ikia munan te mena, bare Kaem ko sokel te bagakasan. Ana noko nguanga se kawel bo mena, nangamang ningi nunguning te bagakasan. Ale ana munan umutang te ninguru nina nengerak bagakasan. 13 Mu ana den nina kaural ale ko ninguru ikialko owore la diram bataguru ningarsan. 14 Nina aitak ana ninguru me nanga ikisan, bare amakinta. Bare aninga angamang mu nina ninguru ta nanga ikialko, ale tom nanga Biya Jesus peleruk tairuk mu te, ana nina nego ko amilmilanak iwitatala, nina ana nago ko amilmilaralko.

15 Ani nina agarkalko nengemang aniso mu ko angamang ningi nunguning aram, se umutang ko ani ulengkala iwita ninga manem: ani Macedonia nama se mu, girek ningarkik, ale aking Macedonia bitirik pelerik tai se mu akingtala ningarkikko. Asele nina aga beteral se Judea namirikko. Mu te nina amilmil gira udagi talko.

17 Aninga ikia mu uwutata nungem. Bare me karo tuem. Se nina ikiman ani yam ta balem e? Agi ali imi ko kari balso, ani mel imitang bitirikkowo maso, bare nu me uwutata beteso ewere ko turan iwita e? 18 Bare mena. Kaem mu me kaweloso iwitatala, ani me kawelerem. Ani bitirikko masam, mu ani bitirikko. Ani “aing” masam mu ko nunguning nunguningta ani betesam. 19 Mu awuk, Timothy se Silas se ani agata, ana Kaem ko Namar Jesus Kristus mu ko dugu duap ninga manarukasan. ^{▼▼2 Cor 1:19 Paul, Timothy, se Silas ura bitakasan: Acts 18:5.} Se nu mu kawel kari alo mel me betemonko bare am aing masan mu nunga turan iwita mena. Nu mel bitirukko balso mu nu eng beteso. 20 Kaem ko den awilaya balu beteram mu ko nunguning Kristus bita sapurukkowo. Umutang ko, ana Kaem ko den ikisan mu ana Jesus Kristus ko iki se “Nunguning” masan, ale te Kaem nup biya tusan.

21 Kaem kota nina ta ana ta, sokel nangarso, se Kristus te sokel ago sanamasan. Nu kota anananga giam, 22 Korang Bur nangamang ningi beteram ale te ana noko ma nanga balam, ana Korang Bur nangaram mu te iwita ikinakko, mel sang ago aratukko balam mu uwutata aratu sapurukko.c

23 Ani Kaem koma te den nunguning balsam, ani nengete Corinth me taikasam mu ko duap iwita: mu nenenga ningi ikup saki ago, se ani tairik ining ningarik se nengemang bataguk bore ko me taikasam. Nina ninga nengemang ningi nunguning te sokel ago sanamasan. Se ana mel mu te ninga bitarnak ale ninga diruwunakko iwita mena. Bare ana nina te amilmilaralko ko ura ilusan. ^{▼▼2 Cor 1:24 Bitua kari nunga ura: 2 Cor 12:19; 1 Peter 5:3.}

24